Ikipe y’Igihugu y’u Bufaransa yatangiye neza urugendo rwayo mu Gikombe cy’Isi cya 2026 itsinda Sénégal ibitego 3-1ni mu mukino wabaye ku wa Kabiri, ariko intsinzi yayo yarushijeho kuvugisha abantu kubera amateka mashya yanditswe na kapiteni wayo, Kylian Mbappé.
Mbappé yatsinze ibitego bibiri muri uyu mukino, harimo n’icyo yinjije mu minota y’inyongera (90+6), cyamugize umukinnyi umaze gutsindira u Bufaransa ibitego byinshi kurusha abandi bose mu mateka y’iyi kipe Ibitego . Uyu rutahizamu yahise ageza ku bitego 58 mu mikino mpuzamahanga, arusha igitego kimwe Olivier Giroud wari usanganywe agahigo k’ibitego 57.
Nyuma y’igice cya mbere cyarangiye amakipe yombi anganya ubusa ku busa, Mbappé yafunguye amazamu ku munota wa 66 mbere y’uko Bradley Barcola atsinda igitego cya kabiri ku munota wa 82. Sénégal yagerageje kugaruka mu mukino ibifashijwemo na Ibrahim Mbaye watsinze igitego ku munota wa 90+5, ariko Mbappé ahita ashyiraho akadomo atsinda igitego cya gatatu cy’u Bufaransa mu kanya gato kari gasigaye.
Imibare y’umukino yagaragaje ko u Bufaransa bwari bwiganje, bugira 54% by’umupira ndetse bugakora amahirwe menshi yo gutsinda kurusha Sénégal.
Iyi ntsinzi ihise ishyira u Bufaransa mu mwanya mwiza mu Itsinda I, aho buzakurikizaho guhura na Iraq mbere yo gusoza imikino y’amatsinda bukina na Norway. Ku ruhande rwa Sénégal, gutsindwa uyu mukino bisize ikipe ikeneye amanota mu mikino itaha kugira ngo ikomeze kugira icyizere cyo kugera mu cyiciro gikurikira.
Mbappé, umaze kuba umwe mu bakinnyi bakomeye, yongeye kwerekana impamvu afatwa nk’inkingi ya mwamba y’u Bufaransa, aho yatangiye Igikombe cy’Isi cya 2026 yandika amateka mashya ashobora kuzakomeza kwaguka mu minsi iri imbere.
