Umuyobozi Mukuru wa Manchester City, Ferran Soriano, yatangaje ko iyi kipe izakomeza guhangana n’ibirego 115 ishinjwa na Premier League, nyuma y’uko yahamijwe ibyaha byinshi muri ibyo birego.
Soriano yabigarutseho mu nama y’ubuyobozi y’umuryango uhuza amakipe y’umupira w’amaguru i Burayi, European Football Clubs (EFC), yabereye i Copenhagen mbere y’inama rusange y’uyu muryango.
Amakuru avuga ko Soriano yabwiye abayobozi b’andi makipe ko Manchester City izakomeza kurwanya ibyo birego, ndetse ko inzira y’amategeko ikiri ndende.Yagize ati: “Byatwaye imyaka umunani kugira ngo tugere aha, kandi bizatwara igihe kinini kurushaho.”
Ibyo birego byatangiye gukurikiranwa mu 2018, aho Manchester City ishinjwa kurenga ku mategeko agenga imari ya Premier League, harimo ibirego by’uko yaba yarazamuye ku buryo butemewe amafaranga yinjizwaga mu masezerano yo kwamamaza yari afitanye n’ibigo bifitanye isano na yo.
Ku wa Gatanu, hamenyekanye ko Manchester City yahamijwe ibyaha byinshi muri ibyo birego 115.
Nubwo ibihano bitarashyirwa ahagaragara, bishobora kuba birimo gukurwaho amanota, gusezererwa muri Premier League cyangwa gucibwa ihazabu ikomeye.
Amakipe yo muri Premier League na yo yatangiye gushaka inama mu by’amategeko ku bijyanye n’indishyi ashobora gusaba Manchester City.
Manchester City yatangaje ko inzira y’amategeko ikiri gukomeza kandi ko hari ibice by’ingenzi bitararangira. Iyi kipe kandi yavuze ko amakuru ajyanye n’uru rubanza agomba kugirwa ibanga.
Perezida wa Manchester City, Khaldoon Al Mubarak, na we yatangaje ko yizeye ko iyi kipe izagaragaza ko ari umwere.
Yagize ati: “Inzira ya Premier League iracyafite urugendo rurerure, kandi icyizere dufite cyo kugaragaza ko iyi kipe ari umwere kiracyakomeye.”
Manchester City biteganyijwe ko izajuririra imyanzuro yafashwe kuri ibi birego.
