Tariki ya 17 Kamena 1944 yabaye umunsi ukomeye mu mateka y'igihugu cya Iceland, ubwo abaturage bacyo bafataga icyemezo cyo guca burundu umubano wa cyami bari bafitanye na Denmark, maze igihugu kigahinduka Repubulika yigenga.
Ibi byabaye nyuma y'igihe kirekire Iceland yari imaze iyobowe n'ubwami bwa Denmark. Nubwo Iceland yari yarahawe ubwisanzure bwo kwiyobora mu 1918 binyuze mu masezerano ya Act of Union, Umwami wa Denmark yakomeje kuba Umukuru w'Igihugu cya Iceland.
Mu gihe cy'Intambara ya Kabiri y'Isi Yose, Denmark yigaruriwe n'Abadage mu 1940, bituma Iceland irushaho kwigenga mu micungire y'ibikorwa byayo bya buri munsi. Ibi byatumye abaturage batangira gutekereza ku bwigenge busesuye no gushinga Repubulika.
Mu matora ya kamarampaka yabaye muri Gicurasi 1944, abaturage benshi cyane bashyigikiye gusesa umubano wa cyami na Denmark no gushyiraho Repubulika. Nyuma y'ibyumweru bike, ku wa 17 Kamena 1944, hatangajwe ku mugaragaro ko Iceland ibaye Repubulika yigenga.
Uwo munsi kandi, Sveinn Björnsson yarahiriye kuba Perezida wa mbere wa Iceland, atangiza igice gishya mu mateka y'icyo gihugu.
Uyu munsi, Iceland izwi nk'imwe mu bihugu bifite ubukungu buhamye, imibereho myiza y'abaturage ndetse n'iterambere rishingiye ku ikoranabuhanga n'ingufu zisubira. Ubwigenge bwatangajwe ku wa 17 Kamena 1944 bukomeje kwibukwa buri mwaka nk'umunsi mukuru w'igihugu, wizihizwa n'abaturage hirya no hino mu gihugu.
Uyu munsi mu mateka, imyaka 82 irashize Iceland ihindutse Repubulika yigenga, ikava ku buyobozi bwa cyami bwa Denmark.
